A actuación a desenvolver nesta nova campaña, promovida pola Consellería de Cultura e Turismo da Xunta de Galicia e financiada con base a fondos FEDER, consta dun complexo programa que ten como obxectivo prioritario completar e ampliar o sorprendente espazo escavado o ano 2018, onde apareceu o alxibe de abastecemento de auga do poboado, un achado emocionante que cambia, en certo senso, a visión que ata hoxe tiñamos do asentamento e a vida cotiá das mulleres e homes que o habitaron. Durante un prazo máximo de execución de 8 meses, o equipo de especialistas de Terra Arqueos S.L. vaise mergullar nunha espectacular paisaxe arqueolóxica de 850 m2, mesmo no ángulo Nordeste da croa, un auténtico "dique rompeolas" onde se xuntan a fonte alxibe, os sistemas defensivos, casas-vivendas e outras estruturas.
Pero sempre existe un primeiro chanzo. No caso da arqueoloxía feita en castros amplamente escavados, visitables e con gran cantidade de construcións á vista, este, inevitablemente, é a limpeza ou, o que é o mesmo, o mantemento. Un traballos duro, moitas veces ingrato e pouco recoñecido, pero que resulta indispensable para o goce social deste colosal xacemento arqueolóxico. Nos últimos días, o equipo de traballo acometeu, e rematou, a limpeza integral do sitio, incluindo croa, antecastros, murallas e parapetos, completando 5 Ha de monumento en perfecto estado de revista. Agora só queda que pasen e gocen!
Vista dun sector da muralla intervido o ano 2018, co torreón semicircular en primeiro plano
Recinto anexo á croa ao remate dos traballos de limpeza
No hay comentarios:
Publicar un comentario